In die tagtigerjare het ons weekliks heerlik gelag vir Spies & Plessiė met permissie en in die negentigs was daar Maak ’n Las. Nou byna 10 jaar later het ons ’n splinternuwe storievertelreeks wat sy oorsprong het uit die skoot van beide sy voorgangers.

Oppiestoep het ’n nuwerwetse aanslag op storievertel en die gepaardgaande nostalgie wat dit teweegbring, met splinternuwe storievertellers sowel as nuwe stories, nuwe glories, ou legendes en ou bekendes.’n Knus atmosfeer heers in die Bolandse wynkelder Kleine Parys in die Paarl waar Oppiestoep verfilm is voor ’n gehoor wat bestaan het uit wakker medepligtiges in die pleeg van humor.  

Kom saam met ons op die avontuur wat komiese staaltjes en pittige uitlatings die lig laat sien en neem jou plek in Oppiestoep, die tuiste van storievertel in Afrikaans.